Bore Manunta est naschidu in Iscanu su deghe de Abrile 1879 e in ie est mortu su vintibattoro de Austu 1934.
Haiat una buttega in sa cale bendìat dogni ispetzia de merce.
A costas de sa buttega bi teniat unu tzilleri atobiu de poetes e cantadores.
Possediat puru una prensa pubblica impreada a produìre s’ozu ermanu.
Amantiosu de poesia, cantigos e musica sarda, est istadu su prus antigu sonadore de organette in ballos, festas e carrasegares de sa ‘idda nostra.
Su chi hazis a bier in fattu a custas paraulas est s’organette sou, su primmu ch’est lompidu a Iscanu a coa de sos ultimos annos de su 1800.
Sa marca est Paolo Soprani e-d’est istadu fattu in Castelfidardo in ue fuit sa primma frabica de custos istrumentos.
Sa cassia est tota in linna cun sos tastos e sos buttones in madreperla.
Est unu traste chi a dies de oe hat prus de 120 annos.

A parte s’organette no possedimos peruna registrazione de musica o ballos e niuna atera cosa chi nos ammentet puru sa bella ‘oghe chi teniat Bore Manunta.
Pro sa poesia nos abbarrat solu una littera chi li haiat imbiadu in risposta su poete Pedru Canu. In custa mandat sos saludos e sos augurios a su poete e cantadore de palcu Tzitzu Rosa, una de sas colunnas de su Parnasu Iscanesu.

Sa passione chi haiat Bore Manunta pro sa poesia sarda l’han muntesa e praticada sos fizos Antoni e Zuanne e sos nebodes Zuanne Pedru Angotzi e Antiogu Milia.
Antoni e Zuanne sun bistados bonos improvvisadores in ottavas, connottos in bidda e in fora.
Ambos han fintzas imbiadu poesias a taulinu a paritzos cuncursos binchinde premios e retzinde apretzios in medas logos.
Zuanne Pedru Angotzi e Antiogu Milia han leadu parte a cuncursos de poesia in tota sa Sardigna otteninde targas e ammentos, e sighin ancora cun impignu e amore.